برادر امیرجان حقانی کو صدمہ!

گلگت بلتستان کے معروف لکھاری، لیکچرر اور بھائیوں کی طرح عزیز دوست امیرجان حقانی کی والدہ محترمہ وفات پاچکی ہیں۔ اناللہ وانا الیہ راجعون۔ 

مرحومہ ایک طویل عرصہ سے بیمار تھیں، حقانی صاحب نے ان کے بارے ایک غمگین کالم بھی لکھاتھا۔ اللہ تعالیٰ مرحومہ کو کروٹ کروٹ جنت نصیب فرمائے اور پسماندگان کو صبر۔ جمیل عطا فرمائے۔ 

پردیس میں جس چیز پر دل بھر آتا ہے وہ یہ ہے آدمی اپنوں کی غمی خوشی میں شرکت سے محروم رہتاہے! 

حقانی بھائی غم  کی گھڑی میں کوئی رسمی الفاظ استعمال کرکے میں آپ کے دکھ کی توہین نہیں کرنا چاہتا، بس اتنا کہنا چاہتا ہوں أعظم الله أجركم وجبرمصيبتكم وغفرلمرحومتكم. 

 پیارے حقانی میں تمہارا دکھ سمجھ سکتا ہوں، بھلا اس سے بڑھ کر کیا دکھ ہوگا کہ جب ہر طرف حسد، عناد اور دشمنی کے کانٹے بچھانے والوں کی قطار لگی ہو، یا ملنے والی مسکراہٹوں کا حجم بھی مفادات کے تابع ہو، ایسے میں وہ بھی نہ رہے جو اپنے معذور ہاتھ اٹھاکر عرش الٰہی سے رحمت کے پھول توڑ کر تمہارے دامن میں ڈالتاہو، جس کی دعائیں کارزارِ حیات کے تپتے صحرا میں ٹھنڈا سایہ ہو! اس کے بعد بھلا کیا رہ جاتاہے؟!

بس اتنی بات سوچ کر کچھ تسلی مل جاتی ہے کہ 

جب احمد مرسل نہ رہے، کون رہے گا؟