حفاظت اور دیگر پریشانیوں کیلئے چند مُفید دُعائیں

 

 سوال۔ جناب مفتی صاحب ڈاکٹر صاحب، کیا کہوں، ہم آپ کو سوشل میڈیا پر پڑھ تے رہتے ہیں، بہت اچھا لگتا ہے، آپ مختلف علمی مسائل پر تحقیقی اور معتدل رائے دیتے ہیں، فرقہ پرستی نہیں کرتے ، اس لئے ہم تین چار دوست جو مختلف مذھب اور پارٹیوں کے ہیں، کو آپ بہت پسند ہیں۔  ہمارا تعلق گلگت بلتستان اور کشمیر   سے  ہے،  ہم یونیورسٹی  سٹوڈنٹ ہیں، کراچی  میں ۔ ہمار ا سوال یہ ہے کہ ہمارے گاؤں میں تبلیغی جماعت کے ساتھ  کچھ علماء کرام آئے تھے، ہم نے بھی اُن کے ساتھ   وقت لگایا ،  اُنہوں نے ہم لوگوں کو تین دُعائیں سکھائی تھی، نمبر ایک حضرت انس کی دُعا ، نمبر 2 حضرت ابو درداء کی دُعا اور نمبر تین تنجینا والا دُرود شریف ، لیکن پھر  ہمارے علاقہ میں     down areas کے کُچھ علماء کرام   آئے تھے، اُنہوں نے  ہمیں بتایا کہ  یہ دُعائیں  پڑھنا بدعت ہے. 

آپ  سے  دو تین  ریکویسٹ ہیں

1۔  ہم یہ دُعائیں  پڑھیں یا نہیں ؟ 

اگر پڑھیں تو پلیز  ہم لوگوں کا پرونینسیئشن  صحیح نہیں ہے، آپ ہمارے لئے وائس کلپ  میں  پڑھ کر بھیج دیں گے؟

2.  یہ کس کتاب میں  لکھا ہُوا ہے کیونکہ وہ لوگ کہتے تھے کہ بہت ساری کتابوں میں  لوگون نے تحریف کیا ہے۔

  اللہ پا ک آپ کو لمبی زندگی دے ۔ العارض ، شراف   شمالی،  اکمل  راہی ، نصیر پریمی ۔ کراچی

  الجواب حامدا ومسلما ومسلما 

                                                   دُعا اور حُسنِ ظن کیلئے آپ کا بہت بہت شکریہ، اللہ پاک  آُ کو سلامت رکھےاور دُنیا اور آخرت میں ہم سب کا پردہ رکھے۔ 

 

باقی یہ  دُعائیں ب ہت مُفید اور مجرب ہیں  اِن میں  دُعائے  انس اور دُعائے  حضرت ابو الدرداء  تو  حدیث سے سے ثابت ہے ۔  ان  دونوں حدیثیوں کی سند  اگرچہ ضُعف سے خالی نہیں    لیکن کثرتِ طُرق سے  حسن  لغیرہ  کے درجہ تک پہنچ  جاتی ہے، اس لئے  اِن دُعاؤں کو پڑھنے میں کوئی  حرج نہیں۔  اور درج ذیل کتابوں میں موجود ہے 

عمل اليوم والليلة لابن السني، (ت: عبدالرحمن کوثر البرنی)  دار الأرقم - بيروت (ص: 307)       کتاب الدعاء للطبرانی،( ت: محمد سعيد بن محمد حسن البخاري)  باب تأويل۔۔۔ بيروت: دار البشائر الإسلامية۔  1987) ج2/ 1294) اس کے علاوہ تاريخ دمشق لابن عساكر (52/ 259) سبل الهدى والرشاد في سيرة خير العباد (10/ 228) اور خصائص کبری میں مذکور ہےباقی دُرودتنجینا  اگرچہ کسی حدیث سے ثابت نہیں  لیکن اہل ِعلم  ، اہلِ تقوی کے تجربہ سے اس کا فائدہ  مند ہونا ثابت ہے،  نیز اِس میں  ایسا کوئی لفظ  نہیں جو   شرعی اُصولوں سے مُتصادم ہو۔  واللہ اعلم 

( مختصر  تعارفی نوٹ کے ساتھ    صوتی تسجیل (voice recording)   بھی حاضر ہے۔ 

اللَّهُمَّ صَلِّ عَلَى سَيِّدِنَا مُحَمَّدٍ صَلاَةً تُنْجِينَا بِهَا مِنْ جَمِيعِ الأَهْوَالِ وَالآفَاتِ وَتَقْضِي لَنَا بِهَا جَمِيعَ الْحَاجَاتِ وَتْطَهِّرُنَا بِهَا مِنْ جَمِيعِ السَّيِّئاتِ وَتَرْفَعُنَا بِهَا عِنْدَكَ أَعْلَى الدَّرَجَاتِ وَتُبَلِّغُنَا بِهَا أَقْصَى الْغَايَاتِ مِنْ جَمِيعِ الْخَيْرَاتِ فِي الْحَيَاةِ وَبَعْدَ الْمَمَاتِ.

نوٹ۔ دُعائے انس کے سلسلہ میں  مخدومنا الکریم  حضرت مُفتی عبد الرؤف سکھروی صاحب مدظلہ العالی  کا رسالہ بھی  قابل مطالعہ ہے۔ ذیل میں  اُس کا لنک بھی دیا جاتا ہے۔ 

http://sukkurvi.com/book/dua-anas-bin-malik.pdf